نیویارک،26اگست(ایس او نیوز/آئی این ایس انڈیا)امریکی ریاست کیلی فورنیا میں ایک نوجوان کو شیر کے ایک بچے کو میکسیکو سے امریکہ میں سمگل کرنے کے جرم میں گرفتار کیا گیا ہے۔امریکہ اور میکسیکو کی سرحد پر حکام نے دیکھا کہ 18سالہ لوئس یدورو ولینیکا کی کار میں شیر کا ایک بچہ ہے تبھی انھیں اس کی سمگلنگ کے الزام میں حراست میں لیا گیا۔لوئس کو اوٹے میسا کی سرحد پر بدھ کی علی الصبح سرحد کراس کرتے وقت پکڑا گیا تھا۔
امریکہ میں محکمہ وائلڈ لائف سروس کے حکام نے اس بنگالی نسل کے شیر کے بچے کو اپنی تحویل میں لے لیا ہے۔نوجوان کا کہنا ہے کہ اس نے اس شیر کے بچے کو میکسیکو کے شہر تیجوانا میں اس شخص سے تین سو ڈالر میں خریدا تھا جو ایک بڑے شیر کے ساتھ سڑک پر چہل قدمی کر رہا تھا۔
سان ڈیئگو میں کسٹم اینڈ بارڈر پروٹیکسن کے ڈائریکٹر پیٹ فلورس کا کہنا تھا کہ سرحد پر محکمہ کسٹم کے حکام کو بیشتر اوقات اس طرح کے غیر معمولی واقعات کا سانا کرنا پڑتا ہے۔انھوں نے کہا کہ اوٹے میسا کی سرحدی انٹری پر حکام نے چیلنجوں کا بڑی مستعدی سے سامنا کیا اور معدومیت سے دوچار جانور کی زندگی بچانے میں مدد کی۔تمام نسل کے شیر قانونی طور محفوظ نسل کے جانوروں کی فہرست میں شامل ہیں اورایسے کسی بھی جانور کو امریکہ میں لانے کے لیے اجازت لینا ضروری ہوتا ہے۔اس شیر کے بچے کو مقامی وائلڈ لائف کے حکام کے حوالے کیا گیا ہے جہاں پر اس کا پورا خیال رکھا جا رہا ہے۔